Sportsoho運動版圖2024年11月號

#CoverStory #致陪伴我的 #釗峰 釗峰歌迷召集！踏入越野跑世界嘅梁釗峰，藉住新歌《致陪伴我的》感謝生命上陪伴過自己嘅人，令佢獨處一人嘅時候都唔會覺得孤單。喺越野跑道上，釗峰都有一班夥伴支持住自己，無論係跑手隊友，定係喺終點等緊佢嘅人，都係令佢越過一個又一個高山低谷嘅重要部分。今期《Sportsoho》，釗峰除咗回顧佢第一次參加 TNF 50公里挑戰賽嘅經歷，仲聯同幾位即將同佢一齊參與今年TNF100公里接力賽嘅隊友，分享咗佢哋嚟緊嘅各樣部署。今年賽事舉行在即，釗峰將會同香港越野跑代表 Harmony、曾參與多個長途越野跑賽事嘅 Hidy、以及曾經以二十幾小時就完走毅行者嘅運動愛好者 DJ 天欣，合組四人接力隊參與100公里挑戰！佢哋將會點樣善用各人嘅長處同特點，去迎戰唔同特質嘅路段，完成哩個艱鉅挑戰？